Sámi giellavahkku 2020

Sámegielaid vahkku dollojuvvo dán jagi 19.–25. golggotmánu. Mihttomearrin vahkuin lea oažžut oidnosii sámegielaid ja loktet diehtomielalašvuođa daid birra.

Sápmelaččain eamiálbmogin lea vuođđolágas dorvvastuvvon vuoigatvuohta doalahit ja ovddidit iežaset giela ja kultuvrra. Suomas hubmojuvvojit golbma sámegiella: anárašgiella, nuortalašgiella ja davvisámegiella. Buot sámegielat leat áitatvuloš gielat, muhto earenoamážit nuortalašgiella ja anárašgiella leat jávkanvára vuolde. Sámiid gielalaš vuoigatvuođat dorvvastuvvojit vuođđolága lassin sámi giellalágain ja máŋggain iešguđet surggiide guoski lágain, degomat ovdamearkka dihte árrabajásgeassinlágas ja pasieantta sajádaga vuoigatvuođaide guoski lágas. Gielalaš vuoigatvuođat gusket buot golmma sámegillii.

Sámegielat bálvalusaid ovttaveardásaš ollašuvvamis leat maid stuorra čuolmmat. Lága gáibidan bálvalusat eai ollašuva buot diliin, ovdamearkka dihte gielalaš ámmátolbmuid váilli dihte. Ovttaveardásašvuođaáittardeaddji oažžu jahkásaččat oktavuođaváldimiid sápmelaččain das, ahte dearvvašvuođa- ja sosiálabálvalusat eai leat oažžun láhkai iežaset gillii. Bálvalusaid oažžumis leat maiddái čielga erohusat iešguđet gielain.

Oktavuođaváldimiin, mat bohtet ovttaveardásašvuođaáittardeaddjái, dihttojit olu čuolmmat sosiála- ja dearvvašvuođabálvalusaid, muhto maid skuvlejumi ovttaveardásaš ollašuhttimis. Sámemánáid vuoigatvuohta iežaset giela dahje iežasgielat oahpahussii lea guovddáš sihke indiviidda vuoigatvuođaid ja ovttaveardásaš meannudeami ja sámegielaid seailuma dáfus.

Buori sámegielaid vahku! 

Fierbmesiiddut davvisámegillii

Tiätu váldáliist anarâškielân

Teâtt väʹlddneeʹǩǩ pirr nuõrttsäämas

19.10.2020