Ahkevealaheapmi

Ovttaveardásašvuođaláhka gieldá ahkevealaheami. Ovttaveardásašvuođalága vealahangielddus guoská buotahkásaččaid vealaheapmái dahjege gii beare sáhtášii vealahuvvot agi dihte.

Ahkevealaheapmi dihtto dávjá almmá dohkálaš vuođuštusa haga ásahuvvon ahkerádjin. Ovdamearkka dihte nu, ahte nuorat eai luitojuvvo iešbálvalangirjerádjosii dahje fuolahusstašuvdnii, 65 jagi deavdán olbmot eai sáhte ohcalit searvvi vástobargguide, doavttirguovddáš heaittiha 70 jagi deavdán doaktáriid ámmáthárjeheaddjisoahpamušaid almmá individuála árvvoštallama haga, dahje 30 jagi deavdán studeanttat eai oaččo seamma vuoládusaid go vuollil 30-jahkásaččat. Dát ovdamearkkat sáhttet leat vealaheapmi, muhto ahkái laktáseaddji ráddjehusat galget álo árvvoštallojuvvot iešguđet dáhpáhusa mielde.

Ahki lea okta dábálaš vealahanvuođuštusain, mat dihttojit máŋgga vuođuštusa vealahandáhpáhusain. Vealaheapmi sáhttá nappo dáhpáhuvvat agi lassin ovttas ovdamearkka dihte sohkabeali, lámisvuođa dahje etnalaš riegádanduogáža vuođul.

Ahkái vuođđuduvvi vealaheapmi sáhttá leat sihke njuolgat dahje eahpenjuolgat. Eahpenjulges ahkevealaheapmi sáhttá leat ovdamearkka dihte almmá vuođuštusaid haga ásahuvvon gáibádusat bargoagiin, vai sáhttá oažžut dihto ovddu.

Ahkái vuođđuduvvi sierralágan meannudeapmi ii leat vealaheapmi, juos meannudeapmi vuođđuduvvá láhkii ja meannudeamis lea dohkálaš mihttomearri ja vuogit juksat mihttomeari leat rievttes láhkai meroštallojuvvon. Ahkerájiid ásaheapmái nappo galgá leat dohkálaš ja rievttes láhkai meroštallojuvvon sivva, ovdamearkka dihte mánáid suodjaleapmi. Ovdamearkka dihte alkoholalága ásahan ahkerájit leat dákko bokte lobálaččat. Meannudeapmi, mas lea vuođđo- ja olmmošvuoigatvuođaid dáfus dohkálaš mihttomearri, ii álot gáibit láhkaásaheami. Ovdamearkkat dakkár meannudeamis leat bálvalusfálliid vuoládusat ealáhatolbmuide.

Positiivvalaš sierrameannudeapmi bargoeallimis agi vuođul

Positiivvalaš sierrameannudeapmi agi vuođul boahtá dávjá ovdan bargoeallimis. Sierralágán meannudeapmi barggus ja bálkáheamis lea lobálaš dihto eavttuiguin: Sierralágán meannudeapmi galgá vuođđuduvvat bargguid kvalitehtii ja daid čađaheapmái laktáseaddji duođalaš ja guovddáš gáibádusaide. Lassin sierralágan meannudeapmi galgá leat rievttes láhkai meroštallojuvvon. Rievttes láhkai meroštallan mearkkaša dan, ahte mihttomeari ii oaččo viggat juksat vugiin, mii lea eahpeáššálaš dahje badjelii mihtiduvvon.

Ahkái laktáseaddji sierralágan meannudeapmi sáhttá leat vuoigadahttojuvvon maiddái, juos dasa lea barggolašvuođapolitihkalaš dahje bargomárkaniidda guoski mihttomearri. Meannudeapmi galgá goittotge leat ovttaveardásašvuođalága mielde “objektiivvalaččat ja áššáigullevaččat” ákkastallojuvvon. Dákkár sáhttá leat ovdamearkka dihte bargguaddinkampánja, mii eastada nuoraid olgguštuvvama bargomárkaniin. Ovttaveardásašvuođalága vealahangielddus ii maiddái guoskka ahkerájiide, mat leat nannejuvvon ealáhat- dahje bargonávccahisvuođaovdduid oažžuma várás.

Ovdamearka: Ahkevealaheapmi sierrajeagárvuolleoffisearaid rekryteremis

Helssega hoavvariekti dubmii bealuštanfámuid ahkevealaheamis sierrajeagárvuolleoffiseara rekryteremis. Áššis lei sáhka das, vealahuvvuigo ohcci, go son ii válljejuvvon sierrajeagárvuolleoffiseara mearreáigásaš bargui, vaikko son livččii leamaš dasa gelbbolaš ja heivvolaš. Ohcci lei bargan ovdal sullasaš bargguid, muhto 33-jahkásažžan su eai válljen su agi dihte. Sierrajeagáriid rekryteremis lei sáhka viđa jagi mearreáigásaš bálvalangaskavuođas. Hoavvarievtti oainnu mielde sierrajeagáriid barggut eaktudit spiehkkaseaddji buriid fysalaš álššaid, ja dain sáhttet ceavzit dušše nuorra olbmot. Sierrajeagárovttadaga doaibmannávccat ledje goittotge sihkkarastojuvvon mearreáigásaš soahpamušaiguin ja gáibideaddji fysalaš teasttaiguin. Ahkekriteara ii maiddái čuvvojuvvon njuolgguslaččat ja plána mielde.