Dahkujierbmi ja ovttaveardásašvuohta

Ovttaveardásašvuođaláhka guoská maiddái dahkujirpmiin ávkkástallamii. Iešguđetlágan dahkujierbmevuogádagaid geavaheapmi ja algoritmmalaš mearrádusbargan lassánit olles áigge, goas maiddái ovttaveardásašvuođagažaldagaid mearkkašupmi daiguin ávkkástallamis stuorru. Dahkujierpmi geavaheapmi sáhttá dagahit vealaheaddji váikkuhusaid, vaikko dát ii livčče vuogádaga ráhkadeaddji dahje diŋgojeaddji ulbmil. Dahkujirpmiin ávkkástallamis leat nuppe dáfus maiddái vejolašvuođat ovddidit ovttaveardásašvuođa ollašuvvama.

Mas dahkujierpmi vealaheapmi sáhttá šaddat?

Dahkujierpmi geavaheami, degomat algoritmmalaš automáhtalaš mearrádusbargama vealaheapmi sáhttá šaddat máŋggain áššiin, ovdamearkka dihte:

  • algoritmma oahpahusdáhta feaillain dahje váilliin
  • algoritmma funet válljejuvvon einnostusvariábeliin dahje kategoriserenkritearain
  • algoritma lea ráhkaduvvon addit mearkkašumi vealahanvuođuštussii degomat ahkái, gillii dahje sohkabeallái

Ovdamearkka dihte algoritmmaid, mat geavahuvvojit ámadaju dovdámis, leat raporteren dovdát buorebut vilgesliikkat olbmuid, daningo dahkujierbmi lea oahpahuvvon vilgesliikkat olbmuid ámadajuiguin. Gápmásat gártet dalle dávjjibut boasttu eahpádusaid ja dušši doaibmabijuid čuozáhahkan vealahemiin. 

Lassin vaikko dahkujierpmi eai divttáše addit mearkkašumi njuolga dihto vealahanvuođuštussii ja dát diehtu váldojuvvošii eret dáhtas, sáhttá dahkujierbmi gávdnat dáhtas olbmo birra dakkár dieđu, mii nannosit laktása vealahanvuođuštussii. Ovdamearkka dihte gillii ja orrunbáikái guoski dieđut soitet muhtun diliin korreleret riegádanduogážiin. Dahkujierbmi sáhttá nappo iešalddes, almmá dan ráhkadeaddji dahje geavaheaddji ulbmila dahje hálu haga, gártat eahpenjuolga vealaheaddji einnostusaide ja konklušuvnnaide ovttastemiin olbmui laktáseaddji dieđuid.

Lea olbmo ovddasvástádus sihkkarastit, ahte dahkujierbmi ii dagat vealaheami 

Dahkujierbmevuogádagas vástideaddji ja dan geavaheaddji degomat eiseváldi, bálvalusa fálli dahje bargoaddi vástidit buot diliin das, ahte sin doaimmat čuvvot ovttaveardásašvuođalága. Vealahanovddasvástádusa dáfus ii nappo leat mearkkašupmi dahkágo mearrádusa olmmoš vai algoritma.

Eastadan ja áican dihte vealaheami, dahkujierpmi doaimmaid galgá gozihit ja testet jeavddalaččat. Ovttaveardásašvuođaváikkuhusaid árvvoštallama, dahjege dan árvvoštallama mot dahkujierbmi váikkuha iešguđet álbmotjoavkkuide ja unnitlohkui gullevaš olbmuide, lea dárbbašlaš dahkat juo ovdal atnuiváldima. Dahkujierbmevuogádagaid čađačuovgin lea guovddáš vealaheami eastadeamis ja goziheamis.

Ovttaveardásašvuođaláhka geatnegahttá eiseválddiid, almmolaš hálddahusbargguid dikšu priváhtta doibmiid, bargoaddiid ja skuvlejumi lágideddjiid ovddidit ovttaveardásašvuođalága. Geatnegasvuohta guoská maiddái dahkujirpmiin ávkkástallamii. Praktihkas nappo juo dahkujierpmi geavaheami plánedettiin galgá árvvoštallat váikkuhusaid ovttaveardásašvuođa geahččanguovllus. Ovddidangeatnegasvuohta guoská maid ovttasbargui ja doaimmaid olggudeapmái priváhtta doibmiide. Ovdamearkka dihte eiseváldi galgá sihkkarastit, ahte dat ii skáhppo ja ávkkástala priváhtta doaibmi ráhkadan vealaheaddji algoritmmain.

Dahkujierpmi geavaheami ovttaveardásašvuođaváikkuhusaid galgá váldit vuhtii maiddái oassin ovttaveardásašvuođaplánemis.

Ovttaveardásašvuođaáittardeaddji goziha fiehttojierbmái ja algoritmmaide laktáseaddji vealaheami

Ovttaveardásašvuođaáittardeaddji goziha vealaheami gildosa maiddái dahkujierpmi ja algoritmmaid geavaheamis. Áittardeaddjái sáhttá guoddalit dahje áittardeaddji sáhttá álgaga vuođul čielggadit, juos šaddá eahpádus vealaheamis dahkujierpmi geavaheamis. [linkitys asiakaspalveluun]

Ovttaveardásašvuođaáittardeaddji doalvvui jagi 2017 ovttaveardásašvuođa- ja dásseárvolávdegoddái dáhpáhusa, mii guoskkai automáhtalaš mearrádusbargamii loanaaddimis. Automatiseren vuođđuduvai vuogádahkii, mas loanaohccit ordnejuvvojedje čuoggáid mielde earret eará orrunbáikki, sohkabeali, eatnigiela ja agi vuođul. Lávdegoddi gávnnahii mearrádusastis, ahte loanaaddi doaibma lea vealaheaddji ja ásahii mearkkašahtti áittasáhku vealahan doaibmái.