Mii olmmošgávpi lea

Olmmošgávpi lea duođalaš rihkus, mas láhkarihkku iešguđet vugiiguin dagaha gillájeaddji ávkkástallama čuozáhahkan, dávjá oažžun dihte ekonomalaš ávkki. Dábálepmosit gillájeaddjis váldojuvvo eret válljenfriijavuohta  ja son ovdamearkka dihte illastuvvo seksuálalaččat dahje son gártá bargat dilis, mii ii leat lágalaš.

Olmmošgávpi sáhttá leat riikkaidgaskasaš, rájiid rasttildeaddji kriminalitehta dahje dáhpáhuvvat ollásit Suomas. Olmmošgávpi sáhttá dáhpáhuvvat maiddái bearraša siste dahje eará lagaš olmmošgaskavuođain.  Ávkkástallan lea hárve ovttaskas dahku, muhto baicca dat láve dávjá bistit áiggi ektui guhká ja lea váldigeavaheami proseassa.

Láhkarihkku sáhttá ávkkástallat gillájeaddji rašes sajádagain, degomat geafivuođain, visttihisvuođain, duođalaš buohcuvuođain dahje gárrenávdnasiid geavahemiin. Gillájeaddji sáhttá leat sorjavaš dahkkis, dahje dahkkiin, ovdamearkka dihte fuolkevuođa, bargobáikki dahje vealgegaskavuođa dihte. Ovdamearkka dihte dáiguin ávkkástala gillájeaddji biddjojuvvo vehážiid mielde dahkki mearridanválddi vuložin, man geažil gillájeaddji massá iežas válljenfriijavuođa ja vejolašvuođa luovvanit ávkkástallamis. Olmmošgávppi gillájeaddji sáhttá orrut olgguldasat friija ja oassálastit servodahkii, muhto sáhttá leat goittotge ovdamearkka dihte seksuála illasteapmái laktáseaddji olmmošgávppi dahje bággobarggu gillájeaddji.

Ávkkástallan ii vealttakeahttá oidno bajil ja olmmošgávpi leage okta čieguskriminalitehta hápmi. Olmmošgávppi oaidnemeahttunvuođa ja dan máŋggaid dihttonvugiid dihte dan lea váttis dovdát. Ovdamearkka dihte lagasgávppi čorgejeaddji dahje restoráŋŋa dárjjodeaddji sáhttá duođas leat bargovuđot olmmošgávppi gillájeaddji. Olmmošgávppi oaidnemeahttunvuohta dihtto ovdamearkka dihte das, ahte restoráŋŋa áššehassan lea goasii veadjemeahttun diehtit, man dilis su bálvaleaddji dárjjodeaddji lea.

Suomas olmmošgávpi lea kriminaliserejuvvon rihkuslága 25 logu 3 ja 3a §:s. Olmmošgávppi meroštallan vuođđuduvvá riikkaidgaskasaš soahpamušaide, degomat ON Palermo almmolašsoahpamuša lassebeavdegirjái. Maiddái olmmošgávppi gillájeddjiid vuoigatvuohta oažžut veahki vuođđuduvvá riikkaidgaskasaš soahpamušaide. 

Olmmošgávppi sáhttá dihttot ee:

  • Seksuála illasteapmi
  • Bargofámuin ávkkástallan
  • Bággonáittoslihttu
  • Mánnágávpi dahje adopteremii bággen
  • Gearjideapmái dahje kriminalitehtii bággen
  • Olmmošealániid ja -gođđosiid gávppašeapmi

Dárkilut dieđut olmmošgávppis leat Olmmošgávppi gillájeddjiid veahkehanvuogádaga siidduin www.ihmiskauppa.fi