Olmmošgávppi gillájeddjiid veahkeheapmi 

Olmmošgávppi gillájeaddjis lea vuoigatvuohta oažžut veahki Olmmošgávppi gillájeddjiid veahkehanvuogádagas [http://www.ihmiskauppa.fi/]. Veahkki sáhttá leat ovdamearkka dihte idjadeami lágideapmi, vuoigatvuođalaš rávven, dearvvašvuođafuolahus- ja sosiálabálvalusat dahje olbmo dorvvolašvuođadillái laktáseaddji doarjjabargu.

Olmmošgávppi gillájeddjiid veahkehanvuogádagas veahki sáhttet oažžut Suoma ja eará stáhtaid riikkavuložat, geat orodit Suomas. Sii, geain lea ruovttugielda Suomas, praktihka doarjjadoaimmain vástida ruovttugielda. Dahjege ruovttugielda dikšu doarjjadoaimmaid suopmelaččaid ja daid olbmuid oasil, geat orodit bistevaš orodanlobiin.

Doarjjadoaimmat lágiduvvojit persovnnalaš dárbbu mielde. Olmmošgávppi gillájeaddjis sáhttá leat ovdamearkka dihte jođus rihkusproseassa, orodanlobi ohcan, ja dasa lassin dárbu iešguđetlágan sosiála ja dearvvašvuođabálvalusaide. Olmmošgávppi gillájeddjiid veahkehanvuogádat dahje iežas sosiálabargi leat dávjá guovddáš oassebealit koordineret iešguđetlágan proseassaid ja doarjut gillájeaddji daid siste.

Olmmošgávppi gillájeddjiid veahkehanvuogádaga fállan bálvalusat vuođđuduvvet láhkii ja olmmošgávppi gillájeaddjis lea vuoigatvuohta bálvalusaide. Olmmošgávppi gillájeddjiid veahkeheapmái guoski láhkaásaheapmi lea nu gohčoduvvon vuostáiváldinlága 4. logus. Olmmošgávppi gillájeddjiid earenoamáš vuoigatvuohta oažžut veahki vuođđuduvvá riikkaidgaskasaš soahpamušaide, degomat Eurohpa ráđi almmolašsoahpamuššii olmmošgávppi vuostásaš doaimmas, ja EU gillájeaddjidirektiivii (2012/29/EU). 

Oassi olmmošgávppi gillájeddjiin eai háliit dahje duostta doarjalit eiseválddiide. Sidjiide veahki fállet organisašuvnnat ja searvegottit.

Veahki fállet máŋggat organisašuvnnat, degomat:

Ovttaveardásašvuođaáittardeaddji bargu našuvnnalaš olmmošgávperaporterejeaddjin lea čuovvut olmmošgávpái laktáseaddji fenomenaid ja olmmošgávppi vuostásaš barggu Suomas. Áittardeaddji ii bargga olmmošgávperaporterejeaddjin áššehasbarggu.

Juos eahpidat olmmošgávppi

Juos vávjját deaivan olmmošgávppi, ále seahkán dillái ieš. Váldde oktavuođa bolesii dahje olmmošgávppi gillájeddjiid veahkehanvuogádahkii. Hohpolaš várre- ja heahtediliin riŋge álo almmolaš heahtenummarii 112.