Ovttaveardásašvuođaplánen

Ovttaveardásašvuođalága mielde eiseválddit, skuvlejumi lágideaddjit ja bargoaddit galget árvvoštallat ja ovddidit ovttaveardásašvuođa iežaset doaimmainis. Lága mielde dáin doibmiin lea maid geatnegasvuohta ráhkadit ovttaveardásašvuođaplána ovddidan dihte ovttaveardásašvuođa. Bargoaddiid buohta geatnegasvuohta guoská bargoaddiide, geain leat jeavddalaččat unnimustá 30 olbmo barggus.

Ovttaveardásašvuođaplánen ovddida ovttaveardásašvuođa

Ovttaveardásašvuođaplána lea plána das, mot organisašuvdna bargoaddin ja iežaset doaimmainis ovddida ovttaveardásašvuođa ja eastada ja seahkána vealaheapmái. Ovttaveardásašvuođaplánema ulbmil lea árvvoštallat ja ovddidit doaimma ovttaveardásašvuođa ollašuvvama geahččanguovllus, ja sihkkarastit doaimma ovttaveardásašvuođa. Ovttaveardásašvuođaplánen viggá buoridit duođalaš ovttaveardásašvuođa. 

Buorre ovttaveardásašvuođaplána lea bargoneavvu, mainna sáhttá dovdát doaimmainis vejolaš vealaheami dagaheaddji diliid ja ráhkadusaid, ja mainna bastá plána mielde ovddidit ovttaveardásašvuođa doaimmainis. Ovttaveardásašvuođaplána lea maid vuohki dahkat oinnolažžan vealaheami, mii lea čihkosis ráhkadusain ja čuozihit doaimmaidis eastadan ja jávkadan dihte vealaheami.

  • Ovdamearkka dihte eiseválddi ovttaveardásašvuođaplána bokte sáhttá dovdát iešguđetlágan áššehasjoavkkuid dárbbuid ja sihkkarastit, ahte buohkat bastet ovttaveardásaččat geavahit eiseválddi fállan bálvalusaid.
  • Skuvlejumi lágideaddji ovttaveardásašvuođaplána fas veahkeha ovdamearkka dihte dovdát iešguđetlágan ohppiid dárbbuid ja sáhttá fállat bargoneavvuid seahkanit heađušteapmái.
  • Bargoaddi ovttaveardásašvuođaplána lea maiddái buorre bargoveahkapolitihka neavvu.

Ovttaveardásašvuođaplánii sáhttá čáhkadit doaimmaid, maid bokte buohkat besset ovttaveardásaččat geavahit bálvalusaid ja oassálastit doaimmaide. Dákkár doaimmat sáhttet leat ovdamearkka dihte:

  • easttahis johtima sihkkarastin
  • dulkabálvalusat
  • iešguđetgielat brošyraid buvttadeapmi 
  • dakkár dieđihankanálaid geavaheapmi, mat leat juksamis.

Ovttaveardásašvuođaplána goziheapmi 

Ovttaveardásašvuođaáittardeaddji goziha, ahte sii, geat galget lága mielde ovddidit ovttaveardásašvuođa maiddái čuvvot geatnegasvuođaideaset. Ovdamearkka dihte gieđahaladettiinis oktavuođaváldimiid áittardeaddji bivdá jeavddalaččat ovttaveardásašvuođaplánaid eiseválddiin, oahppolágádusain ja skuvlejumi lágideddjiin.

Eiseválddiid, skuvlejumi lágideddjiid ja bargoaddiid geatnegasvuođas ráhkadit ovttaveardásašvuođaplána ásahuvvo lágas. Juos doaibmi, guhte lea geatnegahttojuvvon ráhkadit plána, ii ráhkat ovttaveardásašvuođaplána, ovttaveardásašvuođaáittardeaddji sáhttá doalvut ášši ovttaveardásašvuođa- ja dásseárvolávdegoddái gieđahallan láhkai. Lávdegoddi sáhttá geatnegahttit doaibmi ráhkadit plána ja dárbbu mielde ásahit áittasáhku beavttálmahttin dihte mearrádusa.

Leatgo ráhkadeame ovttaveardásašvuođaplána? 

Ovttaveardásašvuođaplánema ráhkadeami doarjjan leat ráhkaduvvon rávagirjjážat ja earret eará čohkkejuvvon buorit geavadagat ovddidit ovttaveardásašvuođa. Sáhtát oahpásmuvvat daidda dáppe: