Ovttaveardásašvuohta skuvlejumis
Juohke oahppis ja studeanttas lea vuoigatvuohta dorvvolaš ja ovttaveardásaš oahppan- ja bajásšaddanbirrasii. Ovttaveardásašvuođaláhka geatnegahttá juohke oahppolágádusa ovddidit ovttaveardásašvuođa ja ollašuhttit lámis oahppi dahje studeantta dárbbašan govttolaš vuogáiduhttimiid. Buot skuvladásiin bohtet dattetge ovttaveardásašvuođaáittardeaddjái oktavuođaváldimat dáhpáhusain, main oahppi dahje studeanta lea ásahuvvon muhtun iešvuođas, ovdamearkka dihte váttu dahje etnalaš riegádanduogáža vuođul almmá vuođuštusaid haga fuonit sajádahkii go earát.
Ovttaveardásašvuođa ovddideapmi oahppolágádusain
Ovttaveardásašvuođaláhka ásaha skuvlejumi lágideddjiide ja oahppolágádusaide guovttelágan geatnegasvuođaid. Vusten vealaheami gielddus guoská maid oahppolágádusaide. Skuvlejumis galgá fuolahit das, ahte skuvlejumi lágideaddji dahje oahppolágádusa doaibman ii leat mange láhkai vealaheaddji. Dát gáibida skuvlejumi geavadagaid dárkkodeami iešguđetlágan ohppiid ja studeanttaid geahččanguovllus, vai juohkehaččas livččii ovttaveardásaš vejolašvuohta oahppat ja buktit ovdan dan maid lea oahppan. Nubbin skuvlejumi lágideaddjis ja oahppolágádusain lea geatnegasvuohta ovddidit ovttaveardásašvuođa ollašuvvama. Dát gáibida ovttaveardásašvuođadili árvvoštallama, plánalaš doaimmaid áicojuvvon čuolmmaid divvumii ja doaibmabijuid váikkuhusaid čuovvuma.
Skuvlejumi lágideaddjis ja juohke oahppolágádusas galgá leat gustojeaddji ovttaveardásašvuođaplána. Plána galgá vuođđuduvvat árvvoštallamii ovttaveardásašvuođa ollašuvvamis ja dan ráhkadettiin galgá gullat studeanttaid, ohppiid ja ohppiid fuolaheddjiid. Plána ovttaveardásašvuođa ovddideaddji doaibmabijut galget leat oahppolágádusa doaibmabirrasa, návccaid ja eará diliid dáfus beaktilat, vuogálaččat ja rievttesláganat. Plána doaibmabijuid váikkuhusaid galgá čuovvut. Láhka ii njuolga meroštala plánaid ođasmahttima áigerájiid, muhto sihkkarastin dihte dan, ahte plána vástida oahppolágádusa doaibmabirrasa, plána ođasmahttingaska ii galggaše leat badjel golbma jagi.
Oahppanbiras galgá leat dorvvolaš ja ovttaveardásaš
Dorvvolaš oahppanbirrasis ii leat heađušteapmi. Ovttaveardásašvuođaláhka gieldá olmmošárvvu loavkideaddji dahje eará áiti atmosfeara duddjoma riegádanduogáža, lámisvuođa, seksuála orientašuvnna dahje eará gildojuvvon vealahanákka vuođul. Heađušteapmi sáhttá leat ovdamearkka dihte buddostallan ja eará givssideapmi, dahje priváhttaeallimii guoski dieđuid dahje šláddariid gilvin. Juos oahppolágádusa bargovehkii gullevaš lea sivalaš heađušteapmái, skuvlejumi lágideaddji sáhttá leat njulgen- ja buhtadusgeatnegas vealaheaddji doaimma dihte. Ovddidan dihte ovttaveardásašvuođa, oahppolágádusain lea maid geatnegasvuohta darvánit eará ohppiid dahje ovdamearkka dihte ohppiid fuolaheddjiid vealaheaddji doaibmamii.
Skuvlejupmái laktáseaddji geavadagat ja sajit galget huksejuvvot nu, ahte oktage ii gártta eahpegovttolaš sajádahkii ovdamearkka dihte dearvvašvuođa dili dahje nana jáhku dihte. Ovdamearkka dihte eallinoainnu oahpahusas sáhttet gártat doarjalit oahpahussii eará skuvllas go oahppi lagasskuvllas. Dalle sáhtuid ja lohkanortnega plánemiin galgá viggat dasa, ahte buot oahppit leat ovttaveardásaš sajádagas oskkus dahje nana jáhkus fuolakeahttá.
Skuvlejumi lágideaddjis lea geatnegasvuohta dahkat dakkár govttolaš vuogáiduhttimiid, mat dorvvastit lámisolbmuide ovttaveardásaš vejolašvuođaid oažžut skuvlejumi. Oahppolágádusaid sajit galget leat easttaheamit, muhto dasa lassin galgá bargat individuála ordnestallamiid, maid lámisolbmuid studeren gáibida. Dákkárat leat ovdamearkka dihte tenttiid sierraordnestallamat allaskuvllain.
Juos deaivvat vealaheami skuvlejumis
Buot studeanttain ja ohppiin lea vuoigatvuohta ovttaveardásaš ja dorvvolaš oahppanbirrasii. Gánnáha váldit oktavuođa gažaldatvuloš skuvlejumi lágideaddjái dahje oahppolágádussii, juos skuvlejumis dihtto vealaheapmi. Maiddái studeantagottiin sáhttá oažžut doarjaga vealahandáhpáhusain. Ovttaveardásašvuođaáittardeaddjis sáhttá sihtat veahki vealahandáhpáhusaid čoavdimii ja ovttaveardásašvuođaáittardeaddji sáhttá maid doaibmat vealaheami gillájeddjiid veahkkin.